काठमाडौं : प्रधानमन्त्री केपी शर्मा ओलीको शरीरमा मिर्गौला प्रत्यारोपण सफल भएको छ । प्रधानमन्त्री ओलीलाई उनकी भान्जी समीक्षा संग्रौला ज्ञवालीले मिर्गौला दिएकी हुन् । उनको स्वास्थ्य स्थिति पनि सामान्य रहेको अस्पतालले जनाएको छ। पोष्ट अपरेटिभ वार्डमा सारिएका प्रधानमन्त्रीको होस आइसकेको प्रत्यारोपण टोलीका प्रमुख डा प्रेम ज्ञवालीले जानकारी दिए । उनले भने, ‘उहाँलाई आइसियुमा राखीएको छ।’
अस्पतालका कार्यकारी निर्देशक डा. प्रेमकृष्ण खड्कालेे एक विज्ञप्ति जारी गर्दै प्रधानमन्त्रीको सबै मुख्य सूचकांकहरु राम्रो अवस्थामा रहेको र प्रत्यारोपित मिर्गौलाले पनि काम गर्न सुरु गरिसकेको जानकारी दिएका हुन ।
प्रधानमन्त्रीको प्रत्यारोपण शल्यचिकित्सा टोलीमा डा उत्तमकुमार शर्मा, डा प्रेम ज्ञवाली, डा अनन्तकुमार थिए भने प्रत्यारोपण चिकित्सा टोलीमा डा दिव्यासिंह शाह, महेश सिग्देल, डा मुकुन्द काफ्ले र डा रविन नेपालीलगायतको टोली सहभागी थिए। यस्तै, एनेस्थेसिया तथा क्रिटिकल केयरतर्फ डा अनिल श्रेष्ठ र डा सुवास आचार्यलगायतको टोली सहभागी थियो ।
त्रिवि शिक्षण अस्पतालले बुधबार साँझ विज्ञप्ति जारी प्रत्यारोपण सफल भएको जानकारी दिएको छ। विज्ञप्तिमा प्रधानमन्त्रीका सबै मुख्य अंगले राम्रोसँग काम गरिरहेको उल्लेख गरिएको छ।