९ असार, बुटवल । यौन तथा प्रजनन स्वास्थ्य विशेषगरी सुरक्षित गर्भपतन सम्बन्धि काम गर्ने अन्तर्राष्ट्रिय गैरसरकारी संस्था आइपास नेपालले लुम्बिनी प्रदेशका स्वास्थ्य तथा जनसंख्या मन्त्री भोजप्रसाद श्रेष्ठलाई स्वास्थ्य सुरक्षाका सामाग्री हस्तान्तरण गरेको छ ।
स्वास्थ्य सामाग्री ग्रहण गर्दै लुम्बिनी प्रदेशका स्वास्थ्य तथा जनसंख्या मन्त्री भोजप्रसाद श्रेष्ठले संस्थाप्रति धन्यवाद ज्ञापन गरे । उनले मानव स्वास्थ्यमा आएको विषम परिस्थितिको सामना गर्नमा सरकारी तथा गैरसरकारी निकायको साथ महत्त्वपूर्ण हुने बताउँदै यो स्वास्थ्य संकट छिट्टै अन्त्य हुने विश्वास व्यक्त गरे ।
पहिले पनि कोभिड विशेष स्वास्थ्य सुरक्षाका सामाग्री सहयोग गर्दै आएको आइपास नेपालले यस पटक २४ लाख ५८ हजार मुल्य बराबरको सामाग्री हस्तान्तरण गरेको हो । सेनिटाइजर , केएन-95 मास्क, सर्जिकल मास्क, ग्लोब्स, पीपीई सेट, एप्रोन, पल्सअक्सिमिटर, डिजटल थर्मोमिटर, सुरक्षीत गर्भपतन सम्बन्धि औषधी तथा सामाग्रीहरू, स्वास्थ्य जनचेतनामूलक सामाग्रीहरू वितरण गरिएको सो संस्थाका लुम्बिनी प्रदेश संयोजक जीवन देवकोटाले बताए ।
सो सामाग्री उक्त संस्थाको कार्यक्षेत्र रहेका लुम्बिनी प्रदेशका ३ वटा जिल्ला पाल्पा, अर्घाखाँची र रोल्पा जिल्लाका ११ वटा स्थानीय पालिकाका सुरक्षित गर्भपतन सेवा प्रदान गर्ने स्वास्थ्य संस्थाहरू, स्वास्थ्य कार्यालयहरु, अस्पतालहरूलाई वितरण गर्नेगरी स्वास्थ्य सुरक्षाका सामाग्री बितरण गरेको हो ।
