चैत्र १३, बुटवल । अर्जै गुल्मी–रुपन्देही सम्पर्क समाजको आयोजनामा सोमबार रक्तादन कार्यक्रम सम्पन्न भएको छ । बढ्दो गर्मी संगै रगतको माग बढ्दो भएका कारण संस्थाको सामाजिक उत्तरदायित्व अनुसार रक्तादान कार्यक्रमको आयोजना गरिएको संस्थाका अध्यक्ष यमबहादुर अर्यालले बताए । रक्तसञ्चार केन्द्र बुटवलको प्राविधिक सहयोगमा सम्पन्न रक्तदान कार्यक्रममा ५५ पिन्ट रगत संकलन भएको कार्यक्रम संयोजक तथा संस्थाका उपाध्यक्ष रेशम भण्डारीले बताए ।
कार्यक्रममा समाजका अर्का उपाध्यक्ष मनोज गौतमले अहिले पनि रगत दिन धेरैले आनाकानी गर्ने गरेको बताउंदै रक्तदान जीवनदान हो भन्ने जागरण पैदा गर्नका लागि समाजले रक्तादन कार्यक्रम गर्दै आएको बताए । समाजले यस अघि अप्ठ्यारोमा परेकाहरुलाई सहयोग, विभिन्न आश्रममा खाद्यान्य सहयोग, सरसफाई, पारिबारीक मिलन जस्ता कार्यक्रम गर्दै आएको भन्दै उनले सामाजिक उत्तरदायित्व अनुसार रक्तदान कार्यक्रम गरेको बताए ।
गुल्मी जिल्लाको मालिका गाउँपालिका वडा नं. ६ अर्जै बाट विभिन्न पेशा व्यवसाय एवं स्थायी रुपमा बसोबास गर्नेहरु बीच आपसी भाईचाराको विकास गर्ने उद्देश्यले गठन भएको समाजले बार्षिक कार्ययोजना अनुसार विभिन्न कार्य गर्दै आएको समाजका सचिव ओमप्रसाद अर्यालले बताए ।
