कार्तिक २४ । बुटवल ।
सिएमए तालिम केन्द्र बुटवलको तेस्रो ब्याज (२०५२/५३) को तेस्रो पुनर्मिलन कार्यक्रम लुम्बिनी प्रदेश सरकारका पूर्व स्वास्थ्य मन्त्री तथा प्रदेश सभाषद् भोजप्रसाद श्रेष्ठको प्रमुख अतिथ्यतामा होटल न्यु इरा बुटवलमा सम्पन्न भएको छ । कार्यक्रमका अध्यक्ष दलबहादुर गुरुङले राखेको ‘सामुहिक कार्य प्रस्ताव’ माथि आफ्नो बिचार राख्दै प्रमुख अतिथि श्रेष्ठले स्वास्थ्य सम्बन्धित व्यक्तिहरुको संस्थाले स्वास्थ्य क्षेत्रमै सामुहिक सेवामूलक कार्यक्रमका विकल्प पेश गर्दै अगाडि बढ्न सुझाए । श्रेष्ठले स्वास्थ्य र शिक्षाको क्षेत्रमा राज्यले उचित लगानी नगरेसम्म वास्तविक विकासको महसुस जनताले अनुभूत गर्न नसक्ने बताए ।
भेलाले स्वास्थ्य समृद्धिका लागि फाउन्डेसन स्थापना गर्न भीष्मराज भुसालको संयोजकत्वमा पाँच सदस्यीय कार्यदल गठन गरेको छ । जसका सदस्यहरुमा भागिरथ राना, सीता पराजुली, बुद्धिप्रसाद पन्थ र मणि पंगेनी रहेका छन् । कार्यदलले सो विषयमा अध्ययन गरी एक महिनाभित्र समितिलाई प्रतिवेदन बुझाउने छ । भेलाले आगामी चैत १५ र १६ गते प्युठानको स्वर्गद्वारीमा चौथो पुनर्मिलन कार्यक्रम गर्ने निर्णय समेत गरेको छ । भेलाले संस्थाका अध्यक्ष दलबहादुर गुरुङ लुम्बिनी प्रदेश सरकारको शिक्षाविज्ञमा नियुक्त भएकोमा बधाई ज्ञापन समेत गरेको छ । भेलाको औपचारिक कार्यक्रम समापन पश्चात् बुद्ध जन्मस्थल लुम्बिनी भ्रमण गरेको छ । कार्यक्रममा सहभागीलाई भागिरथ रानाले स्वागत गरेका थिए भने महेश चापागाईंले सञ्चालन गरेका थिए ।
