काठमाडौ : नेपाल आयुर्वेद चिकित्सा परिषदद्वारा लिईएको आयुर्वेद चिकित्सकहरुको लाईसेन्स परीक्षामा ५९ प्रतिशत परीक्षार्थी उत्तीर्ण भएका छन् । परिषदद्वारा गत फागुन ३ गते काठमाडौँमा संचालित ब्याचलर अफ आयुर्वेदिक मेडिसिन एण्ड सर्जरी (बी.ए.एम्.एस्.) विषयको लाईसेन्स परीक्षाका कुल ३९ परीक्षार्थी सहभागी मध्ये २३ जना मात्र उत्तीर्ण भएका हुन् ।
गत वर्षदेखि सुरु भएको परिषद्को लाइसेन्स परीक्षामा ६ महिना इन्टर्नसीप पुरा गरेपछि विद्यार्थीहरुले भाग लिन पाऊँछन् ।
नेपालमा त्रिभुवन विश्वविद्यालय अन्तर्गत दुई वटा र नेपाल संस्कृत विश्वविद्यालय अन्तर्गत तिन वटा कलेजमा बी.ए.एम्.एस्. को पठनपाठन हुदैंआएको छ । भारतबाट पनि बी.ए.एम्.एस्. अध्ययन गरेर आउने विद्यार्थीहरुको संख्या उल्लेखनीय मात्रमा छ ।
हालसम्म आयुर्वेद चिकित्सा परिषदमा ७२९ जना आयुर्वेद चिकित्सक दर्ता भएका छन् । काउन्सिलको स्थापना वि.सं. २०४५ सालमा भएको हो।
यस अघि काउन्सिलले भदौ १४ गते लिएको लाइसेन्स परीक्षामा शतप्रतिशत उत्तीर्ण भएका थिए ।
