बुटवल : अहिले काठमाडौंस्थित राष्ट्रिय जनस्वास्थ्य प्रयोगशालामा मात्र परिक्षण गर्दै आइएको कोरोना परिक्षण केन्द्र अब भैरहवामा हुने भएको छ ।
प्रदेश ५ सरकारले भैरहवामा कोरोना भाइरस (कोभिड–१९) परीक्षण प्रयोगशाला स्थापना गर्ने भएको हो ।
भैरहवाको अञ्चलपुरस्थित गहुँबाली अनुसन्धान केन्द्रमा प्रयोगशाला बनाउन थालिएको बताइएको छ । प्रयोगशाला बनाउन गहुँबाली अनुसन्धान केन्द्रको एउटा भवन निश्चित गरी काठमाडौंबाट विशेषज्ञ प्राविधिक बोलाइएको र रियल टाइम पीसीआर मेसिन लगायत उपकरण जडान गरेपछि एक हप्ताभित्रमा प्रयोगशालामा सञ्चालनमा ल्याउन सकिने प्रदेश स्वास्थ्य निर्देशनालयका निर्देशक डा. राजेन्द्र गिरीले बताए ।
देशभर अन्यत्र कोरोना परीक्षण प्रयोगशाला नहुँदा काठमाडौंस्थित राष्ट्रिय जनस्वास्थ्य प्रयोगशाला पठाउनुपर्ने बाध्यता रहेको छ ।
प्रदेश ५ का सामाजिक विकास मन्त्री सुदर्शन बरालले भने ‘कोरोना मात्र नभई अन्य संक्रामक रोगहरुको परीक्षणका लागि पनि प्रयोगशाला चाहिने भएकाले अन्तर्राष्ट्रिय मापदण्डको र सुविधासम्पन्न बनाउँदै छौं,’ ।
