नयाँ दिल्ली : भारतमा २१ दिने लकडाउनको कडाईका साथ पालना गराउन सरकारले आर्थिक प्याकेज घोषणा गरेको छ । भारतकी वित्तमन्त्री निर्मला सितारामनले आज गरेको घोषणा अनुसार ८ करोड ३० लाख परिवारले निःशुल्क खाना पकाउने ग्यास सिलिन्डर पाउनेछन् ।
गरिब कल्याण योजना अन्तर्गत तीन महिनासम्म प्रत्येक परिवारको सदस्यले पाँच केजी चामल र एक केजी दाल प्रति महिनाका दरले निःशुल्क पाउनेछन् । प्याकेज १७ खर्ब भारतीय रुपैयाँ रहेको छ । जसमा कोरोना भाइरसका संक्रमितको उपचारमा खटिने चिकित्सकका लागि ५० लाख भारुको बिमा समेत छ ।
भारत सरकारले २१ दिन लकडाउन गरेपछि नागरिकको जीवन सहज बनाई दैनिक उपभोग्य सामाग्रीको आपूर्ति गराउन यस्तो योजना ल्याएको हो ।
त्यहाँ कोरोना भाइरसको संक्रमित र मृत्यु हुनेको संख्या बढेपछि लकडाउन लम्बिने सम्भावनालाई दृष्टिगत गरी आर्थिक प्याकेज घोषणा भएको भारतीय सञ्चार माध्यमहरुले जनाएका छन् ।
एजेन्सी
