कपिलवस्तु : जिल्ला सुरक्षा समिति वैठकले कोरोना भाइरस (कोभिड–१९) को संक्रमित बढ्दै गएपछि कपिलवस्तु जिल्लालाई जेठ ५ सम्म सिल गर्ने निर्णय गरेको छ । आज सोमबार साँझ ५ बजेबाट जिल्ला शिल हुनेछ ।
भारतबाटै आएकाहरुमा कोरोना संक्रमण भेटिएपछि सबै नाका सिल गर्ने निर्णय गरेको हो ।
सोमबार मात्र यशोधरा गाउँपालिकामा ८ जना र बुद्धभूमि नगरपालिकामा २ गरी १० जना कोरोना संक्रमित भेटिएपछि थप सर्तकता अपनाउँदै सिल गर्ने निर्णय गरिएको हो ।
स्थानीय प्रशासन ऐन २०२८ को ६(३) क र संक्रामक रोग ऐन दफा २० बमोजिम जिल्लाभित्र सवारी साधन, उद्योग, निर्माण कार्यमा पूर्ण रोक लगाइएको छ ।
सिल भएपछि अब पूर्वपश्चिम राजमार्गमा आवतजावत गर्ने अत्यावश्यक खाद्यान्नका मालवाहक, दुधका ट्यांकर, एम्बुलेन्स लगायतका साधनहरु नरोकिकन आउजाउ गर्न सक्नेछन् भने तरकारी तथा खाद्यान्न किनमेलका लागि विहान ७ बजेदेखि ९ बजेसम्म समय छुट्याइएको छ ।
पछिल्लो समय भारतबाट लुकिछपी आउने क्रम बढेको छ भने सीमा नाकामा २ हजार भन्दा बढी नेपाली नेपाल प्रवेश गर्न जम्मा भएका छन् ।
