बुटवल : कोरोनाको कहर छ विभिन्न जिल्लाहरू सिल छन तर भारतका विभिन्न सहरबाट स्वदेश फर्कने क्रममा सीमा क्षेत्रमा अलपत्र परेकामध्ये पाँच सय १० जना नेपालीको बुधबार साँझ उद्धार गरी रुपन्देही ल्याइएको छ ।
रोजगारीका लागि भारतको मुम्बई, दिल्ली, हरिद्वार, राजस्थान, कानपुरलगायत सहरबाट कोरोना महामारीले गर्दा नेपाल आउन खोजेका उनीहरू नौतनवाको क्वारेन्टाइनमा २१ दिनको बसाइँ पूरा गरी नेपाल फर्किएका हुन् । उनीहरुलाई बुधबार साँझ बेलहिया नाकाबाट बसमार्फत रुपन्देही ल्याइएको हो ।
रुपन्देहीको तिलोत्तमा र सिद्धार्थनगर नगरपालिकाको पहलमा स्वदेश ल्याइएका उनीहरूमध्ये दुई सय ३३ जना तिलोत्तमा नगरपालिका–१५ को मधवलिया माविको क्वारेन्टाइनमा र दुई सय ७७ जना सिद्धार्थनगर नगरपालिकाको भैरहवास्थित लिलाराम न्यौपाने मावि र भैरहवा माविको क्वारेन्टाइनमा बस्ने छन् ।
फोटो : पत्रकार प्रतीक पौडेल
