काठमाडौं : बुधबार देशभरमा ३२ जना कोरोना भाइरस संक्रमित थपिएका छन् । स्वास्थ्य मन्त्रालयले दिउँसोको नियमित पत्रकार सम्मेलनमा २५ संक्रमित थपिएको जानकारी दिएको थियो भने साँझ थप ७ जनामा संक्रमण देखिएपछि बुधबार देशभर कुल ३२ संक्रमित थपिएका हुन् ।
साँझ थपिएका संक्रमितको प्रदेश १ स्थित प्रयोगशाला र बिपी कोइराला स्वास्थ्य विज्ञान प्रतिष्ठानमा परीक्षण पुष्टि भएको हो । उनीहरू झापाका ५ जना, धनकुटा र धरानका १–१ जना भएको प्रदेश १ मुख्यमन्त्री कार्यालयले जनाएको छ ।
दिउँसो मन्त्रालयले जानकारी दिएका संक्रमितहरू कपिलवस्तुका १३, बाँकेका ६, धनकुटाका ५ र नवलपरासी पश्चिमका एक जना हुन् ।
धनकुटाका ५ जनामा भने मंगलबार साँझ नै संक्रमण पुष्टि भएको थियो । त्यसैको औपचारिक जानकारी मन्त्रालयले बुधबार गराएको हो ।
योसँगै नेपालमा संक्रमित संख्या ४ सय ३४ पुगेको छ ।
