१४ चैत बुटवल । मायादेवी गाउँपालिका रुपन्देहीका विद्यालयहरुमा मुख स्वास्थ्य परीक्षण तथा पशिक्षण अभियान सुरु भएको छ । सुण्डी मध्यमिक विद्यालय वडा नं ४ बाट गाउँपालिकाका अध्यक्ष ध्रुव नारायण चौधरीले कार्यक्रमको शुभारम्भ गरे । मायादेवी गाउँपालिकाको आर्थिक सहयोग एवं आधुनिक समाज डेन्टल केयर प्रालि बुटवलको प्राविधिक सहयोगमा अभियानको सुरुवात गरेको हो ।
कार्यक्रममा बोल्दै गाउँपालिका अध्यक्ष चौधरीले मुख स्वास्थ्यको क्षेत्रमा गरिएको यो कार्यक्रमले साच्चिकै जनसमुदायमा मुख स्वास्थ्यलाई प्रभावकारी बनाउन विद्यार्थीहरु मार्फत उनीहरूको घरपरिवार हुँदै समाजमा आमूल रुपान्तरण हुने विश्वास व्यक्त गरे । उक्त कार्यक्रममा आधुनिक समाज डेन्टल केयर प्रालिका अध्यक्ष अमृत भुसालले स्वास्थ्यको क्षेत्रमा केही गर्न आफूलाई हुटहुटी लागेकोले निजी व्यवसायी भएतापनि सार्वजनिक हितका कार्यक्रमहरुमा निरन्तर सेवा गर्दै आएको बताए । कार्यक्रम गाउँपालिका उपाध्यक्ष तारादेवी यादव, वडा नम्बर ४ का अध्यक्ष धनपाल मल्लाह, पालिकाका स्वास्थ्य संयोजक भास्कर आत्रेय, विद्यालयकी शिक्षिका शशी आले तथा आधारभूत स्वास्थ्य केन्द्रका प्रमुख देवीदिन चौधरी लगायतले आ-आफ्नो धारणा राखेका थिए । कार्यक्रममा विशेषज्ञ डाक्टर तथा स्वास्थ्यकर्मीहरुको एवं शिक्षक प्रतिनिधिको उपस्थिति रहेको थियो ।
यो अभियान मायादेवी गाउँपालिका अन्तर्गतका २० वटा सरकारी विद्यालयमा सञ्चालन गरिदैछ र अभियानको समापनको समयमा तीनवटा समुदाय स्तरीय बृहत दन्त शिविर आयोजना गरिने स्वास्थ्य संयोजक भाष्कर आत्रेयले बताए ।
