काठमाडौ – प्रधानमन्त्री केपी शर्मा ओली स्वास्थ्य उपचार गरी सिंगापुरबाट शुक्रबार स्वदेश फर्किएका छन् । सिंगापुरबाट थाइल्याण्ड हुँदै दिउँसो १२ बजे ओली नेपाल आएका हुन ।
नेपाल कम्युनिष्ट पार्टी (नेकपा) अध्यक्षसमेत रहेका ओलीको स्वास्थ्य स्थिति बुझ्न भन्दै सिंगापुर गएका नेकपाका प्रस्तावित उपाध्यक्ष वामदेव गौतम र महासचिव विष्णु पौडल पनि ओलीसँगै नेपाल फर्किएका हुन ।
मृगौलाको समस्याका कारण ‘एन्डीबडी’ को मात्रा बढेर प्रधानमन्त्री ओली भदौ ५ गते सिंगापुर गएका थिए । उनको सिंगापुरस्थित नेशनल अस्पतालमा उपचार भएको थियो ।
यसअघि पनि प्रधानमन्त्री ओली गत साउन १८ गतेदेखि २७ गतेसम्म सिंगापुरमै उपचार गराएर स्वदेश फर्किएका थिए । अब भने प्रधानमन्त्री तत्काल फ्लोअपमा जानुनपर्ने, पहिले जस्तै तन्दुरुस्त भएको कुरा नेकपाका महासचिव पौडेलले बताए ।
सातौं चरणको प्लाज्मा फेरिसिस गत बुधबार सकिएपछि प्रधानमन्त्री स्वेदश फर्किएका हुन् । प्रधानमन्त्रीको साथमा उनकी पत्नी राधिका शाक्य, स्वकीय सचिव राजेश ब्रजाचार्यलगायत छन् ।
उपचारकै क्रममा सिंगापुरमा रहँदा प्रधानमन्त्री ओलीले दुई पटक टेलिप्रिजेन्स प्रविधिमार्फत मन्त्रिपरिषदका सदस्यसँग सरकारका कामको बारेमा जानकारी लिएका थिए ।
