गुल्मी : गुल्मी जिल्लामा माघ २१ गते स्वास्थ्य बिमा कार्यक्रम घोषणा हुने भएको छ । गुल्मी क्षेत्र नं. १ प्रतिनिधि सभा सांसद तथा परराष्ट्रमन्त्री प्रदिप ज्ञवालीले स्वास्थ्य बिमा कार्यक्रमको घोषणा गर्ने कार्यक्रम रहेको स्वास्थ्य बिमा बोर्डका जनस्वास्थ्य अधिकृत खिमलाल ज्ञवालीले जानकारी दिए ।
दुई नगरपालीका र १० गाउँपालिकाका प्रमुख, उपप्रमुख तथा वडाध्यक्षहरु र सवै स्थानीय तहका स्वास्थ्यकर्मीहरुलाई स्वास्थ्य बिमाको बारेमा अभिमुखीकरण तालिम सम्पन्न भएको छ । भने प्रत्येक वडाहरुमा दर्ता सहयोगी कार्यकर्ता छनौट गरिएको ज्ञवालीले बताए ।
अहिले बिमा दर्ता सहयोगीहरुको अभिमुखीकरण तम्घासमा संचालन भइरहेको छ । सहयोगीहरुलाई स्वास्थ्य बिमा के हो ?, प्रत्येक घर परिवार कसरी यो प्रक्रियामा आवद्ध गर्ने ?, लगत संकलन, स्वास्थ्य बिमा परिचय पत्र वितरण र कार्यक्रममा आवद्ध भए बापत भुक्तान गर्नुपर्ने योगदान रकम लगायतका बिषयमा प्रशिक्षण भइरहेको बिमा बोर्डका प्रदेश संयोजक मनोज पौडेलले बताए ।
बिमाको माध्यमबाट जोखिम कम गरेर आम नेपाली नागरिकलाई स्वास्थ्यको पहुँच स्थापित गर्न यो कार्यक्रम संचालन भएको गुल्मी जिल्ला दर्ता अधिकारी डिकेन्द्र बिष्टले बताए । उनले माघ, फागुन र चैतमा बिमा कार्यक्रममा आवद्ध परिवारले जेठ १ गतेबाट स्वास्थ्य सेवा प्राप्त गर्नेछन् । भने बैशाख, जेठ र असारमा आवद्ध भएकाले भदौबाट, साउन, भदौ र असोजमा आवद्ध परिवारले मंसिरबाट र कार्तिक, मंसिर र पुसमा आवद्ध परिवारले माघ १ गतेबाट स्वास्थ्य सेवा प्राप्त गर्ने डिकेन्द्रले बताए ।
